Page 7 - Fasnachts-Zeitung 2019

7

Chinderfasnacht vom 2019

Am Donnschtig dr 28. Februar 2019 isch es wieder so wiit,
Zum IIstoh uf em Neumattschuelplatz isch es denne Ziit.
Mir starte am Zwei uf em Pauseplatz bim Neumatt,
mir freue uns scho jetzt, das wird sicher sauglatt.

Au i däm Johr wärde wieder 65 Klasse derbii sii,
mir freue uns wie immer, sind so vieli Kinder mit derbii.
Mitmache tüend Kindergärte und Primarschuelklasse vo Aesch,
Pfeffige und Duggige, au d’HPS Münchestei isch do.
D’ISB und au d’GSR Sprochheilschuel vo Aesch mached mit,
das finde mir super und wie immer e riesige Hit.

Hunderti Kinder spienzle stolz unter ihrer Larve füre,
und denn heissts kennsch mi, kennsch mi nid oder nüme?
Zwerge, Könige, Glöön, Waggis, Schneemänner /- fraue oder Drache,
verschiedeni Larve und Kostüm chame im Kindsgi und der Schuel mache.
Au s’Chääreli mit Täfeli, Räppli oder emene Bliemli dörf nid fähle,
all die Zueschauer am Strooserand wämmr demit doch beehre.

Wär Luscht het mit ere Gruppe oder ellei uns
z’unterstütze a dem Tag
trifft sich spötischtens am viertel vor Zwei uf der
Rinacherstroos wenn er mag.

Unseri Route agfüert vo de Sytestächer, füert uns
wie immer durch d’Gartestrooss, Neumattstrooss, em
grosse Platz bi Migros und Coop, wiiter zum Tramweg,
durch d’Gartestrooss, Tschöpperlistrooss, Kluusstrooss,
durch de Krebsebach- und Saalwäg direkt uf der
Mühliplatz.

Fliissigi Hälfer händ dört inzwüsche es Zvieri für
d’Kinder parat gmacht,
jetzt heissts Larve abzieh, s’isch gschafft und jedes
Herz lacht.

Au für die grosse Aktive gits uf em Mühliplatz öpis
z’picke und z’trinke,
Mir danke so allne Pfyffer, Drummler, Guggelüt,
dene Flinke.
« Jo Aesch bigott », scho jetzt hoffed mir natürlich
uf Sunneschii,
So isch en Kinderumzug mit Räppliräge töller für
Gross und Chlii.
Fürs Chinderfasnachts OK: Christina Gmünd